chef manar

chef manar

Cairo . Since April 2015
102 Reviews
Added places
27
Benefited people
2
Reviewed first
94
Added reviews
102
Added photos
18
Liked places
27

My reviews

  • Review by chef manar of Johnny Carino's
    5 years ago
    من المطاعم الأيطالية ال ممكن تروحها في أي وقت وتسمتع بأكل وقعدة وخدمة كويسة جدا والكلام دا بينطبق على أي فرع من فروع كارينوز .. كل تجاربي معاه قبل كدة كانت ممتازة جدا لحد امبارح بس لما جربت البيتزا من عنده من باب التغيير يعني وطلعت أسوأ بيتزا أكلتها في حياتي طلبنا 3 أنواع من البيتزا المارجرينا وبيتزا الفراخ المشوية مع الباربكيو والنوع التالت كان بالسي فوود كل التوبينج ال على البيتزا ملوش أي طعم السي فوود مستوي زيادة جدا والمارجريتا كانت عبارة عن طعم أعشاب بس ال تعتبر معقولة هي بيتزا الفراخ رغم أن الباربكيو كان كميته زيادة اوي العجين في كل الأنواع كان ناشف بزيادة وطبقته كانت سميكة فكانت صعبة في الأكل جدا .. شوربة اليوم كانت نوعين شوربة الطماطم والفراخ بالكريمة طلبناهم مع الأكل بيجو بسرعة والنوعين كانوا حلوين جدا ومظبوطين .. قبل الشوربة بينزل سلة العيش مع طبق في زيت زيتون مع توابل .. كارينوز تجربة حلوة جدا بكل أطباقه الرئيسية والمقبلات وكل حاجة بس بعيدا عن البيتزا. .
  • Review by chef manar of AM Kitchen
    5 years ago
    سندوتشات ووجبات رئيسية واطباق إفطار مختلفة من المطبخ الأمريكي بس مميزة وفي نفس الوقت خفيفة عن غير المعتاد المعروف عن المطبخ الأمريكي الدسم! قعدته جميلة جدا الصبح ومناسبة عشان تاخد الفطار بتاعك مع القهوة هناك خاصة لو الفطار دا عبارة عن بان كيك مع صلصة التوت (26 جنيه) ودا لو أنت بتحب طعم التوت ال ما بين الحلو والاذع لك لو بتحب الحاجات المسكرة أكتر يبقى ممكن تختار من ال بيتقدم مع الكراميل أو النوتيلا.. بالنسبة للغدا ف انت عندك منيو كبير ومتنوع وهتلاقي حاجات كتير جديدة مجربتهاش قبل كدة من الكاسادياز والبوريتو وانواع كتير جدا من التغميسات والسنوتشات الباردة والساخنة والسلطات. .لكن لو عايز نصيحتي في غدا خفيف ويكسر ملل الغدا بتاع كل يوم وأكتر حاجة حبتها عند إيه أم يبقى لازم تجرب سندوتش السلمون المدخن البارد مع كريما الجبنة بالبصل و ال capers سعره (46 جنيه) الاختيارات كتيرة اوي ومتنوعة وهتحب جدا تزور المكان تاني بعد كدة علطول!
  • Review by chef manar of Khan Madinaty
    5 years ago
    مطعم سوري موجود في كمبوند مدينتي في مول أرابيسك وال قدر يميز نفسه في وقت قصير جدا .. المطعم مساحته متوسطة مش كبيرة.. القعدة والإضاءة عنده كئيبة شوية مش مكان ممكن تخرج تتغذى فيه مثلا احسن حاجة انك تطلب دليفري .. على الرغم أن الخان عنده منيو سوري متنوع وفيه كل حاجة إلا أنه مميز أكتر في السندوتشات والمناقيش خاصة سندوتش الشيش طاووق من أحلى الحاجات ال ممكن تتطلبها هناك وهتلاقي نفسك بتكررها كل مرة .. الخدمة عندهم ممتازة جدا من أحسن مطاعم مدينتي في مستوى الخدمة لو الدليفري أتأخر شوية صغيرين بس بيفضل كل شوية يتصل يعتذر ويبعت أكل تاني مجانا عشان الأكل جه متأخر ولو في أي مشكلة في الأكل بيبعت غيره علطول ويتصل تاني يسأل على مستوى الخدمة والأكل كانو عاملين ازاي .. خان مدينتي من الأماكن ال لازم تجربها قريب ..
  • Review by chef manar of Pottery Cafe
    5 years ago
    من أكتر الكافيهات ال تقريبا كل القاهرة بتروحها خاصة في الويك اند .. الكافيه زحمة علطول والكلام دا بينطبق على كل الفروع لأن ببساطة ممكن تروح في اي وقت من اليوم وتسمتع جدا بالقعدة والأكل هناك ومستوى الخدمة .. وطبعا من أحلى الحاجات الممتعة ال ممكن تفطر بيها الصبح هي اللبنة مع الجرجير والخيار ال بتتقدم مع زيت الزيتون والخبز اللبناني (38 جنيه) وممكن تطلب دا كله مع اي نوع قهوة بس القهوة الامريكانو مع الحليب (20 جنيه) من أحسن أنواع القهوة ال ممكن تطلبها هناك. باقي المنيو كبير زي معظم الكافيهات فيها مقبلات وسلطاات وشوربات وأطبقا رئيسية يعني كمان مناسب جدا أنت تاخد الغدا هناك مع أصحابك .. المكان مناسب للتجمعات الكبيرة والمقابلات والاجتماعات ..
  • Review by chef manar of Dr. Samar Al Amrete
    5 years ago
    من الدكاترة ال أكتسبت شهرة أكتر بردو من خلال ظهورها في برنامج اجتماعي كل يوم أحد . مشهورة جدا باهتمامها بكل حاجة طبيعية يعني هتلاقيها علطول بتقول خلطات طبيبعة لعلاج مشاكل تساقط الشعر أو جفاف الجلد أو مشروب معين يساعد على التخسيس والناس بتحب الحاجات دي بشكل كبير فعشن كدة متابعينها كتير جداا وصعب جدا تلاقي حجز عندها أقرب معاد بيكون بعد شهر مثلا عشان تقدر تكشف عندهاا.. من الدكاترو ال عندها ضمير والأهم انها عندها قدرة تسمعك لفترة طويلة وحريصة جدا في وصف العلاج ال بتكتبه..
  • Review by chef manar of TEVOLI DOM
    5 years ago
    سواء تيفولي دوم ال في مصر الجديدة أو ال ف الشيخ زايد ف دي من أكتر الأماكن ال ممكن تدخلها وتشعرك ببهجة شديدة جدا وقادرة انها تغيرلك أي موود سئ لموود تاني أحسن كتير .. ساحة كبيرة كلها كافيهات ومطاعم مشهورة مش هيفرق معاك تقعد في أي كافية ولا مطعم قد ما هيهمك أن تتستمتع بالقعدة الحلوة في الهواء الطلق والمناظر الطبيعية وتستمع جد بالجو والمكان دا غير مستوى الخدمة والنضافة العالي جدا في كل أماكن تيوفولي بس ساحة الجراج الكبيرة بس هي دي مش الحاجة الوحيدة الناقصة في تيفولي مصر الجديدة لكن غير كدة دا مكان مخصوص ضد الأكتئاب :D
  • Review by chef manar of La Poire
    5 years ago
    لابوار من الأسماء الكبيرة في عالم الحلويات الغربية والشرقية ولكنه من فترة كدة كان بدأ مستواه يقل وفقد جزء كبير من شهرته لكن بسرعة رجع وتطور تاني والحلويات بقت أحسن من الأول بكتير ورجع ينافس بقوة محلات الحلويات المشهورة .. فرع الشروق من فروع لابوار الصغيرة وفي كل مرة بروح بيكون المكان هادي ومفيش ناس كتير على عكس باقي فروع لاابوار بس دا ميمنعش ان مستوى الخدمة كويس زي باقي الفروع بالعكس دا كل جربتها من عنده بتكون طازة ومفيش مجال لحاجة قديمة ممكن تاخدها.. الخدمة سريعة والأسعار مناسبة جدا ميعتبرش من المحلات الغالية .. الحلويات الغربية تعتبر أحسن كتيير من الحلويات الشرقية يعني متحاولش تجيب حلويات شرقية من هناك خالص خاصة العلب ال بتكون مشكلة وفيها كذة نوع مع بعضه دي علطول بتكون مسكرة زيادة..لكن غير كدة أنت ممكن تجيب اي نوع تورتة أو جاتو من هناك وأنت مطمن أنها هتطلع حلوة.. الدليفري الخاص بمنطقة الشروق بيوصل لمدينتي ووبيوصل في زمن قياسي بردو..
  • Review by chef manar of Al Shurouq Stationary
    5 years ago
    من أكتر الحاجات ال هتخليك تتعامل مع مكتبة الشروق بعد كدة علطول هي فكرة أنك تلف على كتاب أنت عايزه في كل المكتبات وفي الأخر يطلع موجود في مكتبة الشروق ودا ال حصل معايا أكتر من مرة فعشان كدة مش محتاج انك تدور كتير في اي مكتبة تانية لأن اكيد ال عايزه هتلاقيه هناك!
  • Review by chef manar of Kahraman
    5 years ago
    من المطاعم ال بتقدم كل الأكل المصري الشهير من الطواجن والملوخية والحمام لكل أنواع المقبلات والشوربات المصرية.. لو هتبدأ بالمقبلات فلازم تختار الورق عنب والرقاق بس أحسن بكتير ما تاخد طبق المقبلات المشكل لأن مش كل الحاجت ال فيه هتعجبك فركز على أنواع معينة بس.. الورق عنب من أحلى المقبلات بس السعر مبالغ فيه شوية يعني ال 10 صوابع ب 18 جنيه .. هتلاقي كل أنواع الطواجن موجودة تقريبا هناك من سواء طاجن البامية أو المسقعة أو الخضار المشكل وطاجن المسقعةهو من أحسن الحاجات ال ممكن تطلبها كطبق جانبي(35 جنيه) مع الطبق الرئيسي ال ممكن يكون عبارة عن حمام محشي بالأرز أو الفريك (35 جنيه) أو مكس جريل كهرمان ال بيكون فيه تشكيلة من المشاوي زي الشيش طاووق وصدور الفراخ المشوية والكفتة الشرقية (64 جنيه) الخدمة سريعة أوي في كهرمان ومميزة وليها طابع خاص بيها تخليك ترجعله تاني
  • Review by chef manar of Welatain
    5 years ago
    ولعتين عبارة عن خليط بين محلات الفاست فوود المشهورة وبين السندوتشات المصرية والحلو أنه مميز في الاتنين بيقدم كل نوع بالشكل المظبوط ..سندوتش الجمبري المشوي مع الخضار المكسيكي والجبن الموتزاريلا من احلى الحاجات ال ممكن تطلبها من السندوتشات الخاصة بالسي فوود... الجزء الخاص بالقسم الشرقي زي سندوتشات الكفتة المشوية أو الحواوشي والكبدة الاسكندراني كلها مميزة ومظبوطة وأسعارها بين ال 15 و ال 18 جنيه على حسب كل نوع والحجم بين الوسط والكبير .. ولعتين تجربة ممتازة بكل أنواعه وكل حاجة ي المنيو مميزة وتستحق انك تروح تجرب من عنده علطول..
  • Review by chef manar of Shawer3na
    5 years ago
    من المطاعم ال بتتبنى فكرة تقديم أكل الشارع بس بشكل نضيف زي سندوتشات الكبدة والسجق والحواوشي وشوارعنا قدر يحقق انه يقدم بشكل نضيف فعلا بس مقدرش يزود عليه أو يبتكر ومقدرش يقدمه بالشكل ال كان المفروض يكون عليه.. أنت بيتقدملك خدمة كويسة واكل نضيف بس عنصر الأبتكار والتنوع في المنيو مش موجود عند شوارعنا.. الأسعار معقولة جداا الكمية تعتبر صغيرة المنيو كله مستوى واحد تقريبا كل الأكل مستوى واحد متقدرش تقول أنه بيعمل حاجة مميزة أوي .. شوارعنا تجربة ظريفة مش وحشة بس معتقدش أنك هتحب تجرب تاني من بعد أول مرة!
  • Review by chef manar of Diet To Door
    5 years ago
    دايت تو دور بيقدم خدمة توصيل الأكل الصحي للبيت وبيكون نظام وجبات اليوم كله شامل الوجبات الخفيفة ال بين الوجبات الرئيسية .. نظام الأشتراك بيكون بالشهر أو أقل حاجة 20 يوم مفيش اقل كدة مع امكانية تجربة يوم واحد فقط قبل البدء في الاشتراك.. الأكل الصحي ال بيقدوا بيكون شبه الأكل البيتي شوية ودا بعتمد بردو على نظام كل أسبوع والاكل ال فيه .. في ايام فيها محشي وفراخ على الغدا وأيام فيها الحواووشي قراخ أو لحم الجدول قريب أوي للأكل للبيتي ودا ممكن يكون مُريح لناس كتير انها تاكل حاجة متعودة عليها وفي نفس الوقت تخس. بالنسبالي الاكل بعيد جدا عن الأبتكار كان ممكن يكون في ابتكار أكتر من كدة وكان ممكن يكون في تنوع عن كدة كمان .. الاكل مفتقر للنكهات بشكل كبير وقريب من طعم الأكل المسلوق بس ف دي حاجة ممكن تخليك تزهق ومتكملش غير شهر واحد بس بالكتير دا غير أن السعر ممكن يكون غالي بالنسبة لجودة الأكل .. 120 جنيه لليوم وأقل اشتراك 20 يوم ..
  • Review by chef manar of Banque Misr
    5 years ago
    أجدد فروع بنك مصر ال فتحت من فترة قريبة جدا في مدينتي في المنطقة الخاصة بتجمع البنوك في مدينتي . الميزة ال هتلاقيها في الفرع دا أنه فاضي ومفيش عليه زحمة جامدة ف كل مرة بتروح فيها هتخلص علطول ول استنيت فيكون وقت الأنتظار وقت قليل أوي ..
  • Review by chef manar of Limousine Abu Ziad
    5 years ago
    مكتب ليموزين أبو زياد من اول المكاتب ال اتعاملت معاها في مدينتي ولسة بتعامل معاهم .. مستوى الخدمة هش ثابت ابداا مرة يكونوا كويسين جدا وملتزمين بالمواعيد ومرات تانية لا ودي حاجة مش كويسة ابدا .. السواقين ال بيجبهم معرفش بيختارهم على اي اساس بالظبط احيانا كتير بيكونوا متهورين جدا في السواقة واسلوبهم غير مهذب في الكلام .. أسعار عادية زي باقي أسعار المكاتب التانية في المشاوير البعيدة والقريبة .. بس الخدمة مش محافظة على مستوى كويس علطول ولازم تنبه جدا من السواقين المتهورة في السواقة وتشتكيه بعدها علطول!
  • Review by chef manar of Peking
    5 years ago
    من المطاعم الصينية المشهورة جدا من فترة طويلة وفي رأي الشخصي أن سبب نجاحها واستمرارها الفترة دي أنه بيحاول يرضي الذوق العام للناس فهتلاحظ أن الأكل ميعتبرش صيني أوي وأكيد أن الأكل الصيني مختلف عن دا بكتير بس ميمنعش أنه مطعم ناجح ومستوى الخدمة والجودة كويس جدا والأكل كمان حلو "بس بردو بعيد عن الأكل الصيني" السبرنج رولز باللحم من المقبلات ال لازم تبدأ بيها 5 قطع (13 جنيه) وبعد كدة طبق الشوربة ال هي انواع عادية جدا بس شوربة بكين من الاطباق الظريفة بردو ال ممكن تجربها (17 جنيه) بتكون عبارة عن شوربة كريمة مع فراخ ومشروم مكونات عادية بس الطعم غني ومميز.. على الرغم من أن البايلا ممكن يكون وجودها غريب شوية في منيو مطعم بيقدم أكل صيني بس بكين سبايسي بايلا من الأطباق المميزة ال ممكن تاكلها هناك (47 جنيه) الكمية كبيرة مُشبعة تكفي شخصين كويس جداا ومش محتاج تطلب معاها حاجة تانية .. مكان نضيف وخدمة سريعة بس بعيد عن الأكل الصيني..
  • Review by chef manar of Dr. Maged Zaytoun
    5 years ago
    استشاري التغذية العلاجية وعلاج مشاكل الجلد والشعر .. من الدكاترة ال ليها خبرة طويلة في مجال التغذية ومعروف من زمان جدا بس ناس كتير ابتدت تعرفه مؤخرا من خلال ظهوره في البرامج التلفزيونية وكان بينزل كل أسبوع نظام غذائي وكان في ناس كتير بتابعو وكان ليهم تجارب ناجحة جدا معاه.. بس بردو ناس كتير لاحظت الفرق في التعامل معاه مباشرة والتعامل من خلال البرنامج أفضل بكتير لأن العيادة علطول زجمة جدا ومن كتر الزحم بيدخل أفراد كتير جدا مع بعض فالاستفادة بتقل كتير طبعا .. الكشف ب 350 والمتابعة كل مرة 50 جنيه.. دكتور ناجح وناس كتير ليها تجاربة ناجحة معاه بس محتاج يكون متكلم أكتر من كدة مع الناس..
  • Review by chef manar of Cafe Supreme
    5 years ago
    كافيه سوبريم من الكافيهات ال محافظة دائما على مستوى خدمة وجودة ثابتة والكلام دا بينطبق على كل فروع الأختلاف بس بيكون في كل مكان على حسب الفيو والقعدة بتاعته لكن انت ضامن مستوى الخدمة أنه كويس علطول..المخبوزات الفريش لازم تكون من اختيارتك الصبح لو رايح في وقت الفطار ومن أحلى الحاجات منعشة جدا ال ممكن تاكلها الصبح هي بانيني اللبنة مع الزيتون والأوريجانو والخيار مع النعناع الفريش وزيت الزيتون (27 جنيه) ولو عايز وجبة غدا خفيفة فهتلاقي اختيارت كتيرة من البيتزا كلها خفيفة ومُشهية بس من أكتر الأنواع المميزة البيتزا مع الخضار المشوي والزيتون والمتوتزاريلا (39 جنيه) .. منيو كافيه سوبريم كبير ومنوع والأهم ان كل حاجة معمولة مظبوط والخدمة كويسة جداا..
  • Review by chef manar of International Eye Hospital
    5 years ago
    من المستشفيات ال كان ليا معاها تجربة ناجحة مش بس أنا ومعظم العائلة عندي كلنا عملنا اللييزك أو (تصحيح الأبصار) هناك .. التعامل كان مع دكتور اسمه طارق النجار من أحسن دكاترة العيون ال ممكن تتعامل معاها في مصر وأنت مطمن .. بيعمل كل الفحوصات الازمة بدقة شديدة جداا مابيتدخلش جراحيا في حاجة غير لما بيعمل فحص مرة واتنين وتلاتة.. وبعد يحدد ايه الازم تعملوا.. هو له أيام محددة في المستشفى مش كل يوم متواجد.. بس من أكتر الدكاترة ال بتتعامل معاك بضمير وتليفونه مفتوح علطول في أي وقت أنت عايزه فيه .. غرف العمليات في المستشفى على مستوى كويس من النضافة والتعقيم .. أهم حاجة انك تتأكد من الدكتور ال هتتعامل معاه ومتسيبش عينك لأيد اي حد!
  • Review by chef manar of Cherry On Top
    5 years ago
    من أحلى التحليات ال ممكن تاكلها في اي وقت بس اليومين دول ضرورية أكتر عشان الجو الحر ال بقينا فيه .. شيري اون توب عبارة عن نكهات مختلفة من الزبادي المثلج مع اختيارتك من الأضافات المُفضلة بالنسبة لك . الأسعار بتبدأ من 16 جنيه لأول حجم بدون اضافات وبتتنهي عند (55 جنيه) للحجم العائلي وطبعا الأسعار بتختلف بزيادة الأضافات والنكهات فبتبدأ ب (32 جنيه للحجم الصغير وبتوصل ل (67 جنيه ) للحجم العائلي.. "نوتي فروزين يوجرت" من أحلى الحاجات الغنية بالطعم وسكرها مظبوط جدا وبتيجي في حجمين بس الوسط(38 جنيه) والكبير(46 جنيه) وبتكون عبارة عن اختيارك من النكهة المُفضلة من الزبادي المثلج مع الاضافات ال عليها من البسكوت أو ال M&m أو الكيت كات والأوريو وبتختار بعد كدة ننكهتك المفُضلة من قطعة الكب كيك .. تجربة جميلة وحلو منعش بسعر مناسب!
  • Review by chef manar of InSeason
    5 years ago
    مفهوم الأكل الصحي ابتدى ياخد شكله ووضعه الصحيح في القاهرة مؤخرا وابتدى الفكر ينتشر بشكل كبير جدا وابتدى الوعي والأهتمام بالصحة والرشاقة يزيد جدا عند الناس والفكرة مبقتش محصورة على طبق السلطة مع الفراخ المشوية بس فكرة أنك تاكل اكل صحي برة البيت معناه أوسع وأعم من كدة بكتير أنت بتدخل مكونات جديدة في نظامك الغذائي , بتدخل أنواع خضار وفاكهة وحبوب مختلفة علشان تحافظ على مستوى كويس من التنوع الغذائي المطلوب و ان سيزون واحد من الأماكن ال قدر يحقق المعادلة دي بنجاح .. قدر يوصل لكل المهتمين بتطبيق نظام غذائي صحي في حياتهم اليومية ويوفر لهم كل ال ممكن يحتاجوا.. لو أنت من المهتمين بعمل نظام "الديتوكس" كل فترة فهتلاقي اختيارت عصائر الفاكهة والخضار هناك متنوعة جدا وتساعد جدا على طرد السموم من الجسم زي عصير اسمه toxin neutralizer ودا عبارة عن عصير تفاح وخيار مع ليمون ونعناع من أكتر الحاجات ال ممكن تساعدك تنقي جسمك من السموم وسعره (25 جنيه) وفي نوع عصير تاني ودا مقوي للمناعة بيكون عبارة عصير جزر مع البرتقال وأناناس مع الليمون والجنزبيل (25 جنيه) دا غير باقي الأنواع ال داخل فيها أنواع تانية من الخضار زي السبانخ والكرفس والبنجر وكل نوع منهم مكتوب جنبه عدد السعرات الحرارية ال فيه وايه فائدته .. بالنسبة لبار السلطات فهو كبير ومتنوع بتكون الطبق ال أنت عايزه مع عدد معين من المكونات المجانية بتختار نوع الخضار المُفضل بالنسبة لك والتوبنج بيكون عبارة اختيارت كتيرة من الببرويتن والفاكهة والحبوب دا غير الأضافات ال ممكن تزودها من الأسارجوس أو الكينوا أو التوفو .. "ذا نيو يوركر" واحد من الأطباق المناسبة جدا لوجبة غدا صحية ودي بتكون عن شرائح ستيك مشوي مع الفلفل المشوي والبصل المكرمل مع المشروم الفريش وطماطم الشيري وقطع خبز القمح الكامل المحمص وجبة صحية مُشبعة جدا سعرها (63 جنيه).. على أد ما التجربة ممتازة جدا والفكرة هائلة الا أنها مش مستوعبة ناس كتير ودا لأن الأسعار غالية بس ميمنعش أنك لازم تعمل زيارة كل فترة عشان الديتوكس ;)
  • Review by chef manar of Kilo Gambary
    5 years ago
    من أكتر الأماكن ال هتكرر زيارك ليها كل فترة من بعد ما تزورها أول مرة وهترتبط بالمكان بشكل عام وبالأكل بشكل خاص .. كيلو جمبري بدأ من فترة متعتبرش طويلة وقدر يحقق نجاح كبير في الفترة دي .. منيو مش كبير ومش متنوع أوي بس المميز أن الأنواع القليلة في المنيو كلها حلوة بلا استثناء كل حاجة بتطلبها من هناك طازة ومعمولة صح ومتقدمة بشكل كويس جدا ونضيف .. الجمبري بيكون عبارة عن جمبري كنافة أو كفتة جمبري أو جمبري قزاز والكمية بتبدا ب 300 جرام (70 جنيه) أو 500 جرام (100 جنيه) او كيلو (200 جنيه) ولو أنت هتطل اي حاجة تانية غير الجمبري يبقى أطلب ال 300 جرام عشان تعرف تدوق حلقات الكاليماري المقلي أو السمك . الأطباق الجانبية في منيوو كيلو جمبري قليلة جدا عبارة عن بطاطس شيبسي نص كيلو (10 جنيه) أو الرز مع الجمبري أو مكرونة .. أطباق جانبية قليلة أوي بس بتمشي مع الجمبري واصلا مش هتحتاج تطلب حاجة أكتر من كدة. مفيش غير نوع واحد بس من المشروبات هناك ودا من أكتر الحاجات المناسبة جد مع أكل السي فوود عموما .. مشروب اسمه فيتامين سي عبارة عن ليمون مع جنزبيل طازة ونعناع أخضر ومكعبات تلج كتيير (10 جنيه) أمتر حاجة ممكن تساعدك أنك تهضم الأكل وأكتر حاجة صحية ممكن تشربها فعلا..
  • Review by chef manar of Subway
    5 years ago
    صب واي من أقدم الأماكن ال قدمت فكرة الاكل الصحي وعرفت الناس علهيا أكتر وقدمته بشكل مختلف لكن للأسف وقف على مستوى معين ومتقدمش عنه ومقدرش ينافس بقوة باقي الأماكن ال بتقدم أكل صحي, مفتقر جدا للتنوع والأفكار الجديدة حتى جودة الأكل اختلفت كتير عن الأول .. أنواع الخبز هي ال تعتبر محافظة على جودتها شوية سواء الخبز المصنوع من القمح الكامل أو خبز البارميزان والزعتر أو الخبز الأيطالي .. كرات اللحم والتونة والستيك مع الجبنة من أحلى الحشوات ال ممكن تختارها للسندوتش بتاعك مع امكانية اضافة جبنة زيادة أو شرائح ستك زيادة .. السندوتش ال 6 انش بيبدأ من 25 جنيه والقدم (49 جنيه) .. صب واي من الأماكن ال كان لازم تتطور أكتر بكتير من كدة وتدخل عالم المنافسة!
  • Review by chef manar of Metro Hyper Market
    5 years ago
    من أكتر فروع مترو ال بلاحظ انها بتتطور كل فترة عن التانية من سنة مثلا كان في كمية شكاوى من فرع مدينتي وفعلا كان في تقصير جامد جدا من الفرع دا .. الخدمة بطيئة جداا والمكان مش منظم ولا نضيف وصعب جدا توصل لل أنت عايزه علطول دا غير الدليفري ال كان بيتأخر بالساعات .. دلوقتي الوضع اختلف ابتدت الخدمة تتحسن كتير العاملين كلهم تقريبا اتغيروا وجه مكانهم عاملين جدااد .. المكان بقى مرتب وكل حاجة بقت متوفرة تقريبا كل أنواع الخضار موجودة طازة قبل كدة كان صعب جدا تجيب خضار طازة من هناك.. بقي فيه جزء صغير جوة خاص بالمخبوزات والقهوة .. الجزارة كلها اتغيرت كمان والدليفري بقى سريع جدا ولو في اي مشكلة بيحلوها علطول . المكان تطور كتيير فعلا عن قبل كدة..
  • Review by chef manar of Tasbeera
    5 years ago
    تصبيرة مطعم بيقدم أكل مصري أصيل مكانه في الدور الرابع في سيتي ستارز المكان كله على الطراز المصري القديم من الخشب والألوان وصور الشخصيات المصرية القديمة.. المنيو كله عبارة عن الأكل المصري الشهير زي الفول والطعمية والسجق والكبدة الأسكندراني.. من الحاجات ال بتعجبني عند تصبيرة هو أن في ابتكار في بعض الوصفات والأبتكار دا مخلي الأكلة محافظة على هويتها المصرية وفي نفس الوقت فيه شئ من التجديد ومن أكتر الأطباق ال هتلاحظ فيها الحكاية دي هو فاهيتا السجق البلدي مع الفلفل الألوان والزيتون نكهة شرقية اصيلة مش بعيدة خالص عن طعم المطبخ المصري .. الطبق دا من أحسن الحاجات ال ممكن تطلبها بيتقدم معاها أرز أبيض وبطاطس مقلية.. بالنسبة للجزء الخاص بالفطير في المنيو فبينطبق عليه نفس الكلام في ابتكار وفي نفس الوقت هو أكل مصري محافظ على نكهته جدا .. الفطير بالتونة والفطير بالجمبري من الانواع الجديدة المختلفة ال نادر جدا تلاقيها موجودة في أماكن تانية فطيرة التونة (35 جنيه) وفطيرة الجمبري طبعا بتكون أغلى (45 جنيه) والنوعين دوول لازمو يكونوا اختيارك من عند تصبير في الزيارة الجابة لأنها أنواع جدية مختلفة هتبعدك عن الأنواع التقليدية.. في كمان أنواع من الفطير الحلو موجودة بالعسل أو المكسرات أو السكر وأسعارهم بتبدأ من 20 جنيه بس لو ناوي تحلي هناك يبقى بلاش الفطير وجرب حاجة من قائمة الحلويات زي أم على (24 جنيه) أو الرز بلبن(15 جنيه).. تصبيرة قعدة حلوة وخدمة ممتازة وأكل نضيف جداا!
  • Review by chef manar of Scalini
    5 years ago
    فيلا شيك واسعة بحديقة واسعة موجود سكاليني في قلب المعادي المكان عبارة عن فيىلا كبيرة وليها حديقة خلفية غير المكان المخصص للأطفال يعتبر من أكتر الاماكن ال ممكن تزورها مع العائلة والأطفال في نهاية الأسبوع وبالذات لو تاخد اليوم كله من الصبح هناك.. سكاليني عنده منيو كبير متنوع فيه كل حاجة و أنت أكيد هتطلب من كل قسم حاجة لو أنت قاعد هناك من الصبح يعني لو حابب تفطر هناك فالأختيارات متنوعة ومميزة بس سندوتش التونة أو السلمون المدخن من الأختيارات المُفضلة بالنسبالي.. سندوتش السلمون بيكون معاه بصل وكابري وبيتقدم في خبز التوست وسعره (53 جنيه) ودا أغلى حاجة موجودة بالنسبة لوجبات الفطار غير كدة هتلاقي حاجات تانية أرخص وطعمها كمان حلو جدا وفريش زي الأومليت بالجبنة أو بالسبانخ (27 جنيه).. بالنسبة للغدا هناك فكمان هتلاقي باقي أصناف المنيو متنوعة ومُشهية جدا .. سكاليني كومبو واحد من المقبلات المُشهية هناك شاملة كل حاجة (فراخ مقلية - حلقات بصل- أصابع الموتزرايلا المقلية -سبرنج رولز) الكمية تكفي 4 أشخاص وسعره (64 جنيه) البيتزا من أحسن الأختيارت ال ممكن تطلبها خاصة لو في اطفال كتير فبيكون دا اختيارهم المُفضل بيتزا مارجيرتا سعرها (30 جنيه) وطبعا بيتزا الخضار المشوي والجبنة من أفضل الأختيارات بالنسبة لي وسعرها (31 جنيه) سكاليني خروجة عائلية جميلة في نهاية الاسبوع!
Next

Places I like

Photos I added

Lebanese restaurant
تعليم كيفية اعداد أنواع الخبز المختلفة
خبز الباحيت الفرنسي