Manar Magdy

Manar Magdy

القاهرة . منذ مايو 2015
18 من المراجعات
الأماكن المضافة
26
مراجعتي كانت الأولى
16
مراجعاتي
18
صوري
9
أماكن فضّلتها
24

مراجعاتي

  • Review by Manar of تنورين
    قبل 5 سنوات
    من المطاعم اللبنانية الشهيرة الموجودة في المعادي .. تنورين مميز بقعدة حلوة واضاءة مناسبة ومكان هائل لتجمعات العائلة والأصحاب .. بالنسبة للأكل ف متقدرش تقول عليه مش حلو ولكن في نفس الوقت مش أحسن أكل لبناني ممكن تاكله في القاهرة في مطاعم كتير بدأت تتميز على تنورين والمنافسة بقت قوية .. طبعا المقبلات اللبنانية الشهيرة ال لازم تتطلبها أول ما تدخل مطعم لبناني أيا كان اسم المطعم.. ورق العنب والحمص البيروتي من أحلى المازات عند تنورين (25 جنيه لكل نوع) الورق عنب البارد مع زيت الزيتون من أحلى الحاجات ال ممكن تبدأ بيها.. بالنسبة للطبق الرئيسي فكان شيش طاووق ودا كان مُخيب للامال لأنه بعيد عن المطبخ اللبناني كأنك طلبته من كبابجي مصري مشوي ومتبل مظبوط وكميته مُشبعة بس بعيد عن المبطبخ اللبناني.. تنورين تجربة حلوة جدا ممكن تكررها كل فترة صغيرة وتحاول تجرب حاجة جديدة في كل مرة تروح فيها..
  • Review by Manar of كافيه سوبريم
    قبل 5 سنوات
    أجدد فروع كافيه سوبريم حاليا هو الفرع الموجود في مدينتي في الفود كورت الجديدة مكانه مميز ويعتبر الأهدى بين الكافيهات المحيطة واخد مساحة كويسة من القعدة برة .. بالنسبة للأكل في كافيه سوبريم فكان معقول الي حد كبير خاصة لأنه كان لسة وقت الافتتاح والوقت دا بتكون الدنيا عندهم لسة ملخبطة شوية فممكن تكون الخدمة لسة محتاجة تتحسن.. سلطة التونة من الحاجات ال حبتها هناك خفيفة ومنعشة ومناسبة للجو دا .. طعم الليمون كان ظاهر جدا مع المايونيز فكانت منعشة جدا ومُشبعة جدا كوجبة غدا (35 جنيه).. سندوتش الدجاج المشوي مع بيستو المايونيز من الحاجات المميزة والخفيفة عند كافيه سوبريم قطع فراخ مشوية مع بيستو المايونيز مع الطماطم (39جنيه) سندوتش صيفي أوي ومعمول صح جدا قطع الفراخ محتفة بعصارتها مش ناشفة زي معظم سندوتشات الفراخ ال بناكلها برة.. الأكل والجو والقعدة في كافيه سوبريم فرع مدينتي هتغيرلك الموود تماما..
  • Review by Manar of كريشين
    قبل 5 سنوات
    بالنسبالي كريشين من قبل ما يفتح في مدينتي وهو سئ حت لما فتح مانبهرتش خالص على الرغم ان مكنش في محلات حلويات تاني في مدينتي .. بس فعلا نادر تلاقي حاجة كويسة عند كريشين. بس لو مُضطر أو مفيش غيره قدامك فحاول تبعد كل البعد عن أي تورتة أو جاتو عنده وخليك في الميني بيتزا او الساليزون أو حتى بقسماط :D بس بلاش الحلو خالص.. بالنسبة للحلويات الشرقية بردوو لاااا .. هو الحاجات المالحة بس عشان تقضي الغرض ومش أكتر من كدة..
  • Review by Manar of باستري هاوس
    قبل 5 سنوات
    بيستري هاوس أجدد محل مخبوزات وحلويات فتح في مول ارابيسك في مدينتي ولحد دلوقتي في رأي هو يعتبر أحسن واحد حاليا لأن كل الموجودين دون المستوى أو عاديين يقضو الغرض بس .. بيستري هاوس أول ما تدخله هتلاقي ان كمية المعروضات قليلة شوية ال هو هتحس انها خلصت على الرغم انه كان بدري مش في أخر اليوم بس لما اشتريت من عندهم كذا حاجة لاقيت ان الأسعار مناسبة جدا مقارنا بباقي محلات المخبوزات في مدينتي جربت خبز الباجيت ونوع تاني خبز بالحبوب الكاملة والشوفان الأسعار كانت (7 جنيه) و (4 جنيه) كان طازة جدا كمان .. الحلو عندهم كان شكله حلو أوي وكان في أنواع نارت جديدة شكلها كان مُغري بس مجربتهاش لسة .. بس عموما لو أنت في مدينتي لازم تعددي تاخد حاجة من بيستري هاوس
  • Review by Manar of اينشتاين كافيه
    قبل 5 سنوات
    من الأماكن الظريفة ال ممكن تقعد فيها الصبح عشان بيكون أهدى كتير عن بليل غير أن المكان مش كبير أوي دا بالنسبة لاينشتاين مصر الجديدة .. جربنا نتغدى هناك مرة وطلبنا نوعين سندوتشات واحد منهم كان عبارة عن قطع فراخ مقلية مع تتبيلة سبايسي وجبنة بارميزان(33 جنيه) والسندوتش التاني كان عبارة عم سلمون مدخن(37 جنيه) والنوعين كانوا حلوين أوي بس الأوردر أتأخر جدا على ما جه لكن غير كدة المكان ظريف جدا والقعدة والأكل أو حتى القهوة مع الحلو بعد الضهر..
  • Review by Manar of مانش اند بيجل
    قبل 5 سنوات
    لو عايز تاخد القهوة مع فطار خفيف الصبح في نهاية الأسبوع أو لو عايز تتطلب غدا خفيف مع سلطة وأنت في الشغل يبقى لازم تتطلب من مانش اند بيجل.. مانش اند بيجل مكان صغير موجود في الزمالك قدام مركز اليمامة بيقدم مخبوزات وسلطات خفيفة وكمان سندوتشات بتكون عبارة عن أنواع مختلفة من الخبز وحشوات متنوعة سواء كانت خضار أو تونة أو أجبان.. من الحاجات الظريفة ال عجبتني عندهم الجرانولا مع الزبادي والعسل عبارة عن طبقات من الشوفان مع الزبادي واللوز المحمص مع فاكهة الموسم والعسل(18 جنيه) سناك ظريف ممكن تاخدو بين الوجبات أو لو عايز تفطر حاجة مختلفة عن المعتاد .. مانش اند بيجل كمان مميز بالمافن وكوكيز الشوكلاتة ودي ممكن تكون تحلية ظريفة مع القهوة بعد الضهر ..
  • Review by Manar of تيستا روزا كافيه
    قبل 5 سنوات
    تيستا روزا من أول الكافيهات الموجودة في نادي مدينتي وعلى الرغم من المكان كبير وبيستوعب عدد كبير الا ان الخدمة هناك سيئة جدا والاوردر بيتأخر بشكل مُبالغ فيه .. الطرابيزات مش نضيفة و بيتاخد وقت طويل جدا عل ما يجي حد ينضفها وياخد منك الأوردر.. خاصة في نهاية الأسبوع بيبقى الموضوع أصعب بكتير .. خاصة لو طلبت أي حاجة مشوية من المنيو زي الشيش طاووق مثلا بتاخد وقت جدا على ما تخلص بس بيعملها حلو عامة الأكل هناك ظريف مش وحش الأيام العادية بتكون القعدة مُنظمة شوية عن كدة والخدمة معقولة عشان كدة ممكن تجرب قعدته الصبح في أي يوم ماعدا الجمعة والسبت..
  • Review by Manar of ديوكس
    قبل 5 سنوات
    ديوكس واحدة من محلات الحلويات المُبهرة وال دخلت المنافسة بشكل كبير جدا مؤخرا حتى في حلويات العيد الشهيرة زي الكحك والمعمول اثبت عن جدارة انه متميز فعلا و ناس كتير جدا كانت مُنبهرة بيه جدا لانهم كانوا اول مرة يجربوا حلوبات عربية من عنده.. بس للأسف على قد ما ديوكس مُبهر ومميز بأصناف حلويات كتير الا انك هتتصدم شوية من بعض الحاجات على سبيل المثال مثلا لو هنتكلم عن حلويات ال كان بيقدمها في رمضان فكانت الكنافة بالمانجة سيئة بمعنى الكلمة دا غير انها غالية جدا (195 جنيه) المانجة نفسها كانت سيئة ومش مسكرة ابدا وحاجة كدة ممكن ترميها علطول اول ما تدوقها.. لو عايز حاجة مميزة من ديوكس فأبعد عن الحلويات الشرقية تماما غير كدة هتستمتع جدا بجميع أنواع الموالح خاصة الميني بيتزا(60 جنيه للكيلو) وجميع أنواع الكب كيك كلها مميزة خاصة كب كيك البرتقال (13 جنيه للقطعة)
  • Review by Manar of حلوانى العبد
    قبل 5 سنوات
    في رأي الشخصي ان العبد دلوقتي بيواجه منافسة قوية جدا عن أي وقت تاني ودا لأن كمية محلات الحلويات ال بتفتفح وتثبت نفسها بقت أكتر بكتير من زمان أيام ما كان كام اسم بس هما ال مشهورين .. أخر حاجة جربتها من عنده كان كحك العيد والبسكوت متقدرش تقول عليه وااو ولا تقدر تقول وحش بس السعر كان معقول جدا (50 جنيه لكيلو الكحك) والبسكوت نفس الكلام طعمه عادي اوي مفيش اي حاجة بتميزه خالص لدرجة انه كان مُمل متقدرش تاكل منه غير واحدة وخلاص . المميز عند انك سهل تشتري العلب ال بيعملها في كل مناسبة من أي مكان لانه بيوزعها في كل السوبر ماركت والهايبر ماركت ف انت مش محتاج تروح المحل ودا بيسهل الموضوع بالنسبة لناس كتير ممكن تكون بتكسل تروح المحل نفسه.. حلويات مولد النبي هي ال مش هتلاقي ناس كتير بتختلف عليها من عند العبد لانه معروف بيها من زمان فكل سنة بتكون حلوة من عند العبد..
  • Review by Manar of ابن حميدو
    قبل 5 سنوات
    مطعم ابن حميدو من المطاعم ال زرتها من فترة طويلة جدا وكان من التجارب الظريفة أوي ال مابتتسيش .. من أول ديكور المكان وصور الممثلين القديمة وجو المكان بشكل عام مُريح جدا .. على الرغم من أنه مروحتش ابن حميدو بقالي كتير بس فاكرة جدا ان الأكل كله كان حلومن أول طبق شوربة السي فوود المخلية ال لازم تطلبها قبل الأكل لحد أرز الصيادية مع طاجن الكاليماري (40 جنيه) وبتخنار نوع الصوص سواء أبيض أو أحمر كل حاجة من الحجات دي كانت نضيفة وطعمها حلو أوي ومُشبعة جدا.. ابن حميدو يعتبر منافس لمطاعم المأكولات البحرية ال ظهرت مؤخرا ودا لانه سعره معقول جداا ومناسب اوي انك تعزم عدد أشخاص كبير هناك خاصة في رمضان ..
  • Review by Manar of تيبيستي
    قبل 5 سنوات
    تيبيستي مدينتي أجدد فروع تيبستي للفطائر والبيتزا في نادي مدينتي .. الطلب عليه كبير جدا خاصة الديلفري عليه طلب أكتر وعلى الرغم من كدة بيوصل بسرعة برضو .. وكالعادة الفطيرة المُفصلة للجميع هي فطيرة "مشكل جبن" ودي خليط من جبن الشبدر - كيري - رومي - موتزاريلا مع الخضار موجود منها حجمين زي باقي الأنواع وسط وكبير (32 جنيه للوسط) و 45 للكبيرة .. تيبستي معروف عند الكل ويعتبر اضافة كويسة "لمدينتي" وقريب جدا هيفتح فرع تاني في التجمع الخامس تحديدا في شارع ال 90
  • Review by Manar of أوليف اند أويل
    قبل 5 سنوات
    المنافسة بقت قوية جدا بين المطاعم اللبنانية الموجودة في القاهرة بعد ما كان صعب جدا تلاقي مطعم لبناني واحد مميز ودا في حد ذاته شئ كويس..أوليف اند أويل واحد من المطاعم دي وأعتقد انه أكتر واحد محتاج ينافس بقوة أكتر من كدة لانه متراجع شوية مؤخرا.. مكانه في كايرو فيتستفال ظريف جدا والقعدة هادية خاصة بعد الضهر كدة غير انه مناسب جدا للتجمعات الكبيرة.. طبعا المازات اللبنانية ال لازم تبدأ بيها في أي مطعم لبناني هي الورق عنب سواء كان بالزبت أو بدبس الرمان والنوعين حلوين أوي عنده ومفيش فرق كبير في السعر (20 جنيه) و(23 جنيه ال بصوص دبس الرمان) بس لو عايز حاجة مختلفة يبقى الورق عنب مع دبس الرمان هو الأحسن .. بالنسبة للمازات الساخنة هتعجبك أوي البطاطا الحارة(20 جنيه) وعرايس اللحمة (32 جنيه) دي من أكتر الحاجات ال أنصحك تبدأ بيها .. بالنسبة للطبق الرئيسي فممكن تلب أي نوع من المشاوي زي الشيش طاووق(58 جنيه) أو المشاوي المشكلة بس ساعات كتير بتكون زهقان من المشاوي وعايز تجرب حاجة مختلفة فممكن تجرب طبق فتة شاورما الدجاج(52) من الحاجات الظريفة أوي والخفيفة.. أوليف اند أويل ظريف وهادي وأسعاره معقولة جدا عشان كدة ممكن تعمله زيارة كل فترة قريبة ..
  • Review by Manar of ماندرين قويدر
    قبل 5 سنوات
    مفيش اختلاف ولا كلام كتير ممكن يتقال على ماندرين قويدر لان اسمه بيفضل متصدر دائما لأحسن أماكن للحلويات الشرقية في القاهرة .. فروعه منتشرة في أماكن كتير في القاهرة اخرهم كان فرع الرحاب ودا ال محبتهوش أوي بصراحة البسبوسة كانت دسمة جدا غير ان سكرها كان زيادة أوي غير البسبوسة المعتادة عند ماندرين ونفس الكلام كان بالنسبة للكنافة بالكريمة .. تاني مرة قولتلهم أن دا مختلف شوية عن باقي الفروع قالوا عشان لسة فرع جديد ولسة فاتحين ,جربته تاني كان نفس النظام .. فرع ماندرين قويدر الموجود في اميرالد ايمبير هو المُفضل بالنسبالي مفيش ولا مرة بجيب من الفرع ويتطلع فيه حاجة وحشة وطبعا نفس الكلام بالنسبة لفرع مصر الجدديدة.. لو عايز حلو مختلف شوية من عند ماندرين بعيدا عن البسبوسة والكنافة يبقى لازم تجرب الملبن بالقشطة (54 جنيه) للكيلو من الحاجات ال هتفضل تجبها كل مرة تزور فيها مندرين..
  • Review by Manar of لا فندي
    قبل 5 سنوات
    لافندي من المطاعم ال فتحت من فترة قريبة جدا في المعادي تقريبا من 3 شهور .. وأول ما بدأ ينزل الاعلانات بتاعته متوقعتش انه هيبقى حلو لانه كان معتمد على فكرة تقديم الأكل المصري "الشعبي" بس بطريقة مختلفة ودا حسيته هيبقي مُكرر لأن الفكرة دي انتشرت كتير أوي مؤخرا.. بس تقدر تقول ان كل مطعم بيقدر يكون مختلف شوية في الحاجات ال بيعملها وهتلاحظ مثلا انه على الرغم من ان معظم ال في المنيو عندهم موجود في معظم المطاعم ال بتتبع نفس الفكرة بس ميمنعش ان في أطباق مميزة في لافندي زي مثلا طبق مقبلات عبارة عن بطاطس مقلية وعليها خلطة الدوقة المصرية من الحاجات الظريفة أوي ال عجبتني هناك سعرها (10 جنيه) .. نص رغيف اسكندراني والحواوشي من الحاجات ال معظم الناس بتحبها جدا ودي كمان هتلاقي فيها أنواع مميزة من السندوتشات زي سندوتش السجق المشوي مع دبس الرمان والبصل والفلفل والبطاطس سندوتش مُشبع جدا كوجبة غدا بس سعره (35 جنيه).. باقي السندوتشات عبارة عن سجق أو كبدة اسكندراني وكذة نوع من الحواوشي زي الحواوشي بالجبنة الرومي أو حواوشي بالليمون المخلل وحواوشي مع السجق الأسعار كلها بتبدأ من 30 جنيه ودا يعتبر غالي جدا بالنسبة لسندوتشات.. عشان كدة أعتقد ان المنافسة قوية بين لافندي وباقي المطاعم ال بتتبع نفس الفكرة بتاعت "الأكل الشعبي "....
  • Review by Manar of نادي مدينتي الرياضي
    قبل 5 سنوات
    نادي مدينتي الرياضي الموجود في كمبوند مدينتي من النوادي الصغيرة بس معدل التتطور فيه سريع أوي ودا هتلاحظه جدا لو كنت من الناس ال راحت النادي من 6 شهور مثلا ودلوقتي هتلاحظ ان في أماكن جديدة فتحت جوة النادي زي كاقيهات ومكان للبلاي ستيشن .. مشكلة النادي دا بس هي صالة الجيم الموجودة فيه ناقصها أجهزة كتير جدا بس ال عرفته أن المفروض فيه صالة جيم أكبر هتفتح قريب ودا شئ كويس جدا ..
  • Review by Manar of كارباتشو
    قبل 5 سنوات
    مطعم وكافيه كاربتشوالموجود في المتزه الجنوبي (الفود كورت) الجديدة في مدينتي.. المكان منظم وشكله حلو بس مش المُفضل بالنسبالي .. الكافيهات والمطاعم التانية الموجودة في الفود كورت قعدتها وخدمتها أفضل من كاربتشو عشان كدة مش هيكون هو اختيارك الأول لما تروح الفود كورت .. بالنسبة للأكل ال جربته عنده كان مكرونة بالسي فوود غير انها جت متأخر جدا كانت باردة والجمبري كان ال فيها كان مطبوخ زيادة عن اللزوم فكان ناشف اوي ومش حلو .. بالنسبة لساندوتش الفراخ المشوي مع الجين كان عادي مفيش اي حاجة مميزة والبطاطس كانت مليانة زيت .. مانصحكش انك تاكل هناك ممكن تقعد تشرب حاجة بس أو تاخد حلو ماعدا"التشيز كيك" لانها بردو من الحاجات ال جربتها ولاقيتها صعبة اوي تقيلة جدا وسكرها زيادة عن اللزوم .. سموفي البطيخ كان من الحاجات الظريفة المنعشة في الحر..
  • Review by Manar of كوبرميلت
    قبل 5 سنوات
    محلات الحلويات والمخبوزات انتشرت بشكل كبير جدا في القاهرة وكل مكان بتروحه بيعلم معاك جدا خاصة لما بيكون في حاجة معينة بتميز المكان دا سواء كانت مخبوزات أو جلويات غربية أو شرقية وبالنسبالي كوبرميلت من الأماكن المميزة جدا في المخبوزات المالحة زي البيتزا والسندوتشات والعيش .. من الحاجات ال مش لازم تجربها أوي من عنده هي الحلويات الشرقية خاصة الأخيرة ال كان عاملها في رمضان زي الكنافة بالمانجة مثلا ال على شكل قبة والقبة دي عبارة عن شوكلاتة بيضاء.. فكرتها كانت جديدة وشكلها كان حلو بس للأسف كان طعمها سئ جدا وناقاصها حاجات كتير .. المانجة قليلة أوي ومش مسكرة والكنافة نفسها تقريبا مفهاش سكر كلها كانت سئة بمعنى الكلمة. الحلويات الشرقية المشكلة كانت ظريفة مقارنا بالكنافة بس بردو مش أحسن حاجة. كوبرميلت مكان حلو ومميز ويستحق التجربة لكن بعيدا عن الجزء الشرقي..
  • Review by Manar of ريو كافيه
    قبل 5 سنوات
    مطعم وكافيه ريو في منطقة الساوث بارك في كمبوند مدينتي وال فتحت تقريبا من شهرين بس ودا تاني فرع ليه وال عرفته منهم أن فرعهم الأول في أسكندرية في المنتزة وفرع مدينتي هو أول فروعه في القاهرة.. قعدته مُريحة جدا للأعصاب خاصة لأنك طول القعدة بتسمع أم كلثوم أو عبد الحليم تشكيلة جميلة جدا من أغاني زمان.. كريو عامل منيو ظريف جدا لرمضان ودا ال أنا جربته عنده الوجبة كانت عبارة عن فراخ مشوية وأرز بالمكسرات وخضار غير 3 أنواع المقبلات (سمبوسك - ورق عنب- كبة مقلية) واختارك من نوعين الشوربة الموجودة لسان عصفور أو شوربة كريمة بالفراخ مع نوع مشروب من المشروبات الرمضانية.. وكل دا ككان سعره 95 جنيه الخدمة في ريو ممتازة بس مع رمضان الأكل اتأخر شوية بس كانت كل حاجة طعمها حلو أوي ماعدا الشوربة كانت دسمة جدا.. بس خليك فاكر أنه من أكتر الأماكن المُريحة ال ممكن تقعد فيها..
Next

أماكن أفضلها

    صور أضفتها

    شوربة اللسان عصفور من منيو افطار ريو الخاص برمضان
    شورربة كريمة الدجاج الاختيار الثاني من قائمة افطار "ريو" في رمضان
    الدجاج بالجبن والتركي المدخن من الأطباق الرئيسية الخاصة ب "ريو" في قائمة رمضان